Режиссер Думан Еркімбектің Qaitadan фильмінде басты рөлді сомдаған Жасұлан Көпберген «Үздік актер» деп танылды. Ал Фархат Шариповтың «Эвакуация» фильміндегі жұмысы үшін Александр Плотников «Үздік оператор» марапатын алды.
Qaitadan – Думан Еркімбектің алғашқы толықметражды фильмі. Туындыны Мәдениет және ақпарат министрлігі мен Ұлттық киноны қолдау мемлекеттік орталығының қолдауымен Dala Cinema кинокомпаниясы түсірген. Бұл – мемлекеттік қолдаумен түсірілген отандық фильмдердің ішінде прокаттағы табысы 1 млрд теңгеден асқан алғашқы туынды. Фильмде ауылға келген қалалық жігіттің уақыт тұзағына түсіп, бір оқиғаны қайта-қайта бастан кешуі баяндалады. Туындыда жауапкершілік, жанашырлық пен ұрпақтар сабақтастығы тақырыбы қозғалады.
«Эвакуация» тарихи драмасын Шәкен Айманов атындағы «Қазақфильм» ұлттық киностудиясы түсірген. Фильм Ұлы Отан соғысы жылдарында Қазақстанға көшірілген адамдардың тағдырын баяндайды. Туындының режиссері, сценарий авторы әрі продюсері – Фархат Шарипов.
Киносыйлыққа үміткерлердің қорытынды тізіміне министрлік пен Кино орталығының қолдауымен түсірілген Әділ Мерекенің «Күзгі самал» және Гүлшат Смағұлованың «Шатырдағы екеу» фильмдері де енді.
Биылғы байқауда 19 елден 41 фильм сынға түсті. Жеңімпаздар 12 аталым бойынша анықталды.
