АҚШ-тың президенті Дональд Трамп Портленд (Орегон штаты) қаласына және федералдық иммиграциялық мекемелерге әскери күштерді орналастыру туралы жарлық шығарды, – деп хабарлайды Aikyn.kz
Reuters мәліметінше, ол бұл қадамды қала мен ICE (Immigration and Customs Enforcement) объектілерінің «Antifa және басқа ішкі террористік топтардан қорғалуын» қамтамасыз ету қажеттігімен негіздеді.
Трамп әскери күштерге «қажет болса – толық қарқынмен» әрекет етуге рұқсат берді. Ол бұл бұйрықты Қорғаныс министрі Пит Хегсеттқа орындауды тапсырған.
Алайда Портленд қаласының мэрі Кит Уилсон мен Орегон штаты губернаторы Тина Котек бұл шешімге қарсылық білдірді. Олар қаланың әлі тыныш екенін, наразылықтар мен зорлық-зомбылық деңгейінің төмен екенін айтып, әскери интервенцияға негіз жоқ екенін хабарлады.
Қазіргі уақытта Пентагон қандай әскери құраманың жұмылдырылатыны туралы нақты ақпарат бермеді.
