Үш күнге созылған кезең қорытындысы бойынша 16 команданың арасынан үздік нәтиже көрсеткен сегіз ұжым енді жарысты плей-офф кезеңінде жалғастырады. Олардың қатарында Қазақстан атынан сынға түскен Қазақ ұлттық спорт университетінің командасы да бар.
Топтық кезеңде командалар төрт тақтада бақ сынап, әрқайсысы алты матч өткізді. Ойындар 45+30 уақыт бақылауы бойынша өтті. Әр топтың қорытындысы бойынша үздік нәтиже көрсеткен екі команда келесі кезеңге жолдама алды.
А тобында ширек финалға шығатын командалар мерзімінен бұрын белгілі болды. Орал мемлекеттік тау-кен университеті топтағы алты кездесудің барлығында жеңіске жетіп, командалар арасында көш бастады. Олар 12 командалық және 22 жеке ұпай жинап, топтағы абсолютті нәтижеге қол жеткізді. Екінші жолдама Harvard University командасына бұйырды. Америкалық университет өкілдері 7 командалық және 12,5 жеке ұпай еншіледі. Ал University of Melbourne мен Peking University жарыс жолын осы кезеңде аяқтады.
В тобындағы тартысты додада Webster University командасы турнирді толық құраммен өткізе алмады. Ұжым барлық кездесуге үш ойыншымен шығып, әр матчты қарсыласынан бір ұпай кем бастап отырды. Соған қарамастан, команда 5 командалық ұпай жинап, Universidad de Chile-мен тең нәтиже көрсетті. Алайда жеке көрсеткіштер бойынша чилилік команда басым түсіп, плей-оффқа жолдама алды. Ал алғашқы орынды Saint Louis University айқын басымдықпен иеленді. Команда жеке есепте мүмкін болған 24 ұпайдың 22,5-ін еншіледі.
С тобында University of Texas at Dallas топтық кезеңді мінсіз нәтижемен аяқтады. Алты кездесудің барлығында жеңіске жеткен америкалық команда 12 командалық және 19 жеке ұпай жинап, көш бастады. Екінші жолдама 8 командалық ұпай еншілеген National Technical University of Athens командасына берілді. Қазақстандық AlmaU командасы 3 ұпаймен үшінші орынға тұрақтап, жарыс жолынан шығып қалды. Ал Cambridge University төртінші орынға тұрақтады.
Ал D тобының қорытындысы бойынша, Қазақ ұлттық спорт университетінің командасы алты кездесудің бесеуінде жеңіске жетіп, бір матчты тең аяқтады. Осылайша, қазақстандық команда қатысушылар арасында көш бастады. KNUS қоржынында жалпы 11 командалық және 19 жеке ұпай бар. Топтық кезеңнің соңғы туры қазақстандық екі команданың өзара тартысына ұласты. KNUS студенттері әл-Фараби атындағы ҚазҰУ командасымен өткізген екі кездесудің екеуінде де басым түсті. Алғашқы матч 3,5:0,5 есебімен аяқталса, екінші кездесуде спорт университетінің командасы 3:1 есебімен жеңіске жетті. D тобында екінші орынға 7 командалық ұпай жинаған индонезиялық Universitas Gunadarma, ал әл-Фараби атындағы ҚазҰУ 6 ұпаймен үшінші орынға жайғасты. Oxford University төртінші орынға табан тіреді.
Енді әлем чемпионатының жеңіске жету жолындағы шешуші ойындары басталады. 7 тамызда ширек финалдық кездесулер өткізіліп, турнирдің жартылай финалына шығатын төрттік анықталады. Бұл кезеңде Қазақ ұлттық спорт университеті National Technical University of Athens командасымен кездеседі. Жартылай финалдық матчтар 8 тамызға, ал чемпион мен жүлдегерлерді анықтайтын финалдық бәсеке 9 тамызға жоспарланған. Қазақстандық командаға әлем чемпионатының жүлдесіне таласатын финалистер қатарынан көрінуі үшін екі кездесуде жеңіске жету қажет.
Алтынай БАУЫРЖАНҚЫЗЫ,
Алматы қаласы