Осы мақсатта қалада қайтарымсыз гранттар беру, жұмыс орындарын ұсыну және халыққа ақпараттық түсіндіру шараларын ұйымдастыру жүйелі түрде жүзеге асырылып келеді.
Әлеуметтік осал топтарды экономикалық тұрғыдан қолдау мақсатында биыл Шымкент қаласында 99 азаматқа 400 АЕК-ке дейін (1 572 800 теңге) қайтарымсыз грант берілді. Бұл – тұрғындардың өз кәсібін бастауына және қаржылық тәуелсіздікке қол жеткізуіне бағытталған маңызды бастама. Үшінші лег аясында барлығы 398 өтінім қабылданып, оның ішінен комиссия шешімімен 52 жеке кәсіпкер мен 47 жұмыссыз азамат грант иегері атанды. Жыл басынан бері қалада жалпы 432 адам мемлекеттік грант алған. Бұл көрсеткіш шағын және микробизнеске деген сұраныстың жоғары екенін және мемлекеттің бұл бағыттағы қолдауының тиімділігін көрсетеді.
Грант алғандардың басым бөлігі әлеуметтік осал санатқа жатады. Олардың қатарында 55 көпбалалы отбасы, 21 мүгедектігі бар азамат, 17 ерекше баланы тәрбиелеп отырған ата-ана, 5 асыраушысынан айырылған жан, 1 атаулы әлеуметтік көмек алушы бар. Бұл – мемлекеттің «бірде-бір азамат назардан тыс қалмауға тиіс» деген әлеуметтік саясатының айқын көрінісі. Мемлекеттік гранттар қайтарымсыз болғанымен, олардың мақсатты жұмсалуын қадағалау маңызды. Осы ретте Еңбек мобильділігі орталығы жанынан арнайы мониторинг тобы құрылып, әр жобаға тұрақты бақылау жүргізеді. Егер қаржы мақсатсыз пайдаланылса, ол мемлекетке қайтарылады. Бұл талап мемлекеттік қаражаттың тиімді әрі әділ пайдаланылуын қамтамасыз етуге бағытталған. Грантқа өтініш беру үдерісі толық цифрландырылған. Үміткерлер enbek.business.kz платформасы арқылы өз жобаларын онлайн тіркеп, комиссия алдында бизнес-жоспарларын қорғайды. Бұл мемлекеттік қызметтің ашықтығы мен қолжетімділігін арттырады.
Шымкент қалалық Жұмыспен қамтуды үйлестіру және әлеуметтік қорғау басқармасы халықты еңбек нарығына тартуды жүйелі түрде жүргізіп келеді. Жұмыссыздық деңгейін төмендету, әлеуметтік тұрақтылықты сақтау және жаңа жұмыс орындарын ашу – басқарманың негізгі міндеттері. Жуырда Шымкент қаласы прокуратурасының ұсынысы негізінде Еңбекші ауданында ақпараттық-насихаттық жәрмеңке ұйымдастырылды. №94 мектеп базасында өткен іс-шараға 20-ға жуық жұмыс беруші қатысып, 300-ден аса бос жұмыс орны ұсынылды. Жәрмеңкенің нәтижесінде, 70-тен астам азаматқа субсидияланған жұмыс орындары туралы толық ақпарат берілді. 17 борышкер жұмыс іздеуші ретінде тіркеліп, пробация есебінде тұрған 8 азаматтың 4-еуі тұрақты жұмысқа жолдама алды. 90 күннен астам мерзімі өтіп кеткен борышкерлерге «Қарызсыз қоғам» жобасы аясында МӘМС жүйесі бойынша кең көлемді түсіндіру жұмыстары жүргізілді. Бұл іс-шаралар – еңбек нарығында әлсіз санаттағы азаматтарды қолдаудың, олардың әлеуметтік бейімделуін жеңілдетудің маңызды құралы.
Айта кетейік, мемлекет жұмыспен қамту саясаты арқылы әлеуметтік теңсіздікті азайтуға, халықтың табысын арттыруға, кәсіпкерлік бастамаларды қолдауға және жаңа жұмыс орындары арқылы экономиканы жандандыруға ықпал етіп келеді. Шымкент қаласында атқарылып жатқан шаралар – осы мемлекеттік саясаттың жергілікті деңгейдегі нақты нәтижесі. Қолға алынған жобалар мен берілен гранттар алдағы уақытта жаңа кәсіпорындардың ашылуына, экономикалық белсенділіктің артуына және қала тұрғындарының әл-ауқатының жақсаруына ықпал ететіні сөзсіз.
Назгүл НАЗАРБЕК,
Шымкент қаласы