Осындай қаланың бірі – еліміздің шығысында жатқан Өскемен. Кешегі тарихы, бүгінгі өнеркәсібімен аты шыққан өлкеде қазір 360 мыңнан адам өмір сүріп жатыр. Осы орайда шаһардың даму барысын білмекке қала әкімі Алмат Ақышовпен сұхбаттастық.
– Кейінгі бірнеше жылдан бері Мемлекет басшысы Қасым-Жомарт Тоқаевтың бастамасымен ел аумағында «Таза Қазақстан» акциясы тұрақты түрде өткізілетінін білеміз. Сіз басқарып отырған шаһарда экологиялық түйткілдер бары жасырын емес. Өнеркәсіп орындарының шығарындыларын азайту, ауа ластануы секілді мәселелерді шешу үшін қалада қандай жұмыстар атқарылып жатыр?
– Мемлекет басшысының бастамасымен «Таза Қазақстан» экологиялық акциясы жүйелі сипат алып, елді мекендердегі санитарлық тазалық пен қоршаған орта сапасына қоғамның ат салысуын күшейтті. Өскемен қаласында экологиялық мәселелердің, әсіресе өнеркәсіптік шығарындылар мен ауа сапасына қатысты тәуекелдердің барын жоққа шығармаймыз.
Біріншіден, тұрғындардың өтінімдерін жедел қабылдап, нақты орындауға бағытталған кері байланыс тетіктері күшейтілді. Азаматтарды тарту үшін Telegram желісіндегі @TazaQazBot чат-боты іске қосылып, қала бойынша түскен 543 өтінімнің барлығы түгел орындалды. Бұл құрал өтінімдерді жіктеу, орындаушыны бекіту және фотоесеппен жабу арқылы жедел әрекет етуге мүмкіндік берді.
Екіншіден, ауа сапасын бақылау бағытында мониторинг күшейтіліп отыр. «Қазгидромет» дерегіне сәйкес, 2025 жылы Өскемен қаласында 10 автоматтандырылған бақылау посты жұмыс істеген. Сонымен қатар жеке датчиктердің деректерін ұлттық желіге интеграциялау және нәтижелерді AirKz қосымшасы мен интерактивті картада көрсету тәжірибесі кеңейіп келеді.
Үшіншіден, өнеркәсіп шығарындыларын төмендету бойынша жұмыс мемлекеттік экологиялық реттеу талаптары арқылы кезең-кезеңімен жүргізілуде: экологиялық нормаларды сақтау, технологиялық жаңғырту, мониторинг деректеріне сүйене отырып, тәуекелі жоғары ластаушыларға қатысты бақылау шараларын күшейту және алдын алу шешімдерін қабылдау бағыттары өзектендірілді. «Таза Қазақстан» акциясы шеңберінде қалдықтарды жинау, аумақтарды тазарту, ағаш отырғызу сияқты көрсеткіштермен қатар, цифрландыру арқылы бақылауды күшейту тәсілдері де қолданылады.
Мемлекет басшысының тапсырмасы бойынша, Өскеменде қаланы санитарлық тазарту, абаттандыру және көгалдандыру бойынша екі айлық акция өткізілді. Акция аясында апта сайын сенбіліктер өткізілді, аумақтарды, аулаларды, әлеуметтік нысандарды жинап, ағаш отырғызып, өзендер мен көлдерді қоқыстардан тазарттық.
2025 жылы іс-шараларға 12 570 адам қатысты, 2 800 текше метрден астам қоқыс шығарылды, 2 322 бірлік техника жұмылдырылды. Барлығы 32 338 аула, оның ішінде көппәтерлі тұрғын үй қоры – 1 514 аула, жеке сектор – 30 824 аула жиналды. Бұл іске 2 162 кәсіпорын мен ұйым өкілдері қатысты.
Қаланы көгалдандыру жұмыстары да ауқымды жүргізілді. Былтыр 1 сәуірден 31 мамырға дейін 3 900-ден астам көшет (шырша, қайың, күл, терек, тау күлі, қарағаш, үйеңкі, сирень, емен) отырғызылды. 1 қыркүйектен бастап қосымша 805 көшет ектік. 2025 жылы барлығы 10 000-нан астам көшет отырғызылды, оның 3 900-і – көктемде, 6 100-і – күзде. Сондай-ақ сүңгуір көшеттер отырғызылып, жалпы ауданы 21 000 шаршы метрден асатын гүлзарлар жасалды. Бұл іс-шараларды жүзеге асыру экологиялық жағдайды жақсартуға, ауа сапасын арттыруға және жайлы, эстетикалық тартымды ортаны құруға мүмкіндік береді.
– Қала экономикасын ірі өнеркәсіп орындары қолдап отыр. Алдағы уақытта да шаһарда ірі халықаралық жобалар іске асуы мүмкін бе? Өскеменнің өндірістік әлеуетіне қызығушы инвесторлар көп болар?
– Алдағы кезеңде Өскемен қаласында да ірі жобалардың, соның ішінде халықаралық әріптестік элементі бар бастамалардың іске асу мүмкіндігі бар. Қала инвесторлар үшін өндірістік тізбектің қалыптасқандығымен, инженерлік-инфрақұрылымдық әлеуетімен және өндірісті орналастыруға арналған индустриялық аймақтарымен тартымды. Мысалы, Өскемендегі индустриялық аймақтар бойынша инфрақұрылымды кезең-кезеңімен жеткізу және инвесторларды тарту жөніндегі ақпараттар өңірлік инвестициялық порталда жарияланған. Сонымен қатар инвестициялық күн тәртібі халықаралық алаңдар арқылы да ілгерілетіліп келеді. 2025 жылғы 26 қыркүйекте Өскеменде «Altai Invest-2025» халықаралық инвестициялық форумы өтті. Ал энергетикалық тұрақтылық кез келген ірі өндірістік инвестицияның базалық шарты екенін ескерсек, Өскемен ЖЭО-ны жаңғырту және кеңейту жобасына ЕАДБ мен Еуразиялық банктің 2026 жылғы 13 ақпанда ұзақмерзімді қаржы беруі – қаланың инвестициялық әлеуетін күшейтетін нақты қадамның бірі.
– Қалада шағын және орта бизнесті дамыту үшін кәсіпкерлерге қандай жағдай жасалып отыр? Бұл сала азаматтарды жұмыспен қамтуға үлесін қосып отыр ма?
– Қазақстан Республикасының инвестициялық саясаты тұжырымдамасын іске асыру және өңір экономикасын әртараптандыру жөніндегі жұмысты күшейту шеңберінде инвестицияларды тарту – дамудың басым бағыттарының бірі болып қала береді. Атап айтқанда, металлургия, қайта өңдеу өнеркәсібі, ауыл шаруашылығы, қызмет көрсету.
«Даму» кәсіпкерлікті қолдау қоры» АҚ ақпаратына сәйкес, кешенді бағдарлама шеңберінде шағын және орта бизнесті қолдаудың жаңа тетіктері бар. Субсидиялау шеңберіндегі қолдау, «Өрлеу», Өңдеу өнеркәсібі саласындағы ШОБ қолдау бағдарламалары жалғасын табуда.
Мемлекеттік гранттар әлеуметтік кәсіпкерлік субъектілеріне, «Бір ауыл – бір өнім» бағдарламасының курстарынан өткен конкурс жеңімпаздарына «Атамекен» кәсіпкерлер палатасы арқылы беріледі. Бір кәсіпкер үшін мемлекеттік грант сомасы мемлекеттік грант алуға ұсынылған өтінімге байланысты 5 млн теңгеге дейін болады.
ШҚО Кәсіпкерлік және өнеркәсіп басқармасы, ШҚО Кәсіпкерлер палатасымен, «Ертіс «ӘКК» АҚ және Oskemen-Atameken МҚҰ бірлесіп «Шығыс бизнес» кәсіпкерлікті қолдаудың өңірлік бағдарламасы әзірленді. Бағдарлама ШОБ субъектілерін қаржыландыруға қолжетімділікті арттыруға, жаңа бәсекеге қабілетті өндірістер құруға ынталандыруға, жергілікті қамту үлесін арттыруға бағытталған. Аталмыш бағдарламаларды жүзеге асыру қосымша жұмыс орындарын құруға біршама әсер етеді.
Қазір кәсіпкерлікті қолдау мақсатында 2023 жылғы 30 маусымдағы №272 кәсіпкерлік бастамаға жәрдемдесу жөніндегі шараларды ұйымдастыру және қаржыландыру қағидаларымен регламенттелетін мемлекеттік бағдарлама жұмыс істейді, оның шеңберінде халықтың әлеуметтік осал топтары қатарындағы азаматтарға 400 АЕК-ке дейінгі мөлшерде мемлекеттік гранттар беріледі.
2025 жылы Өскемен қаласы бойынша жаңа бизнес-идеяларды іске асыруға 81 грант берілді. Барлық грант алушылар мемлекеттік кірістер органдарында жеке кәсіпкер ретінде тіркелді, қазір өздерінің бизнес-жобаларын іске асыруда.
– Әлеуметтік саланы қолдау – Қазақстанның ең басты ұстанымының бірі. Шаһарда көші-қон мәселесі де барын білеміз, яғни қоныстанушылардан кетушілер көп екені айтылады. Бұған жастардың жұмыссыздық жайы да әсер ететін секілді. Қала әкімдігі осы тұрғыда қандай шараларды қолға алды?
– 2025 жылы Өскемен қаласы бойынша қоныс аударушыларды қабылдау квотасы 66 адамды құрады. Олардың 23-і – Алматы облысынан, 15-і – Қызылордадан, 9-ы – Түркістаннан, 5-і – Жетісудан, 3-і – Жамбылдан, екеуі – Шымкенттен, 8-і – Алматы қаласынан, біреуі Астанадан көшіп келді.
Көшіп келгендердің ішінде еңбекке қабілетті 25 адам бар болатын, оның 21-і, яғни 84 пайызы жұмыспен қамтылды, 3 адам 3 жасқа дейінгі бала күтімімен отыр. Бұған қоса, 16 отбасындағы 50 адамға 36 227 мың теңге көлемінде мемлекеттік қолдау көрсетілді.
Биыл 53 адамды қабылдауға квота берілген. Қазір еңбек күші артық өңірлерден көшіп келген 5 отбасыдағы 16 адам квотаға енгізіліп үлгерді. Оның төртеуі – Алматы облысынан, 5-і – Қызылордадан, 5-і – Жетісудан, екеуі – Астанадан.
Жастарды жұмыспен қамту жайына келсек, былтыр 227 түлек «Жастар практикасы» арқылы және 51 жас «Алғашқы жұмыс орны» бағдарламасы аясында жұмысқа орналастырылды. Биыл қосымша 233 түлекті жастар практикасына жолдау жоспарланып отыр.
– Инфрақұрылым жүйесін айтпай кету мүмкін емес. Қалада ескірген тұрғын үйлер мен жол сапасына қатысты мәселелер барын байқадық. Бұл екі түйткілді реттеу төңірегінде атқарылған істер туралы баяндап берсеңіз? Қазір тұрғын үйлер мен жолдардың тозу деңгейі қандай көрсеткіште тұр?
– Өскемен қаласына біртұтас сәулеттік келбет беру мақсатында көппәтерлі тұрғын үйлердің сыртқы қабырғаларын, шатырын реконструкциялау, «ағымдағы немесе күрделі жөндеу жөніндегі іс-шараларды ұйымдастыру және өткізу қағидалары» шеңберінде Тұрғын үй қатынастары бөлімі Әуезов даңғылы бойындағы үйлердің қасбеттеріне жөндеу жұмыстарын жүргізуді жоспарлап отыр.
Бірінші кезеңде 8 үйді жөндеу көзделген: қасбеттер фиброцемент панельдерімен қапталады, аула жақ бөлігіне сылақ жүргізіліп, суэмульсиялы құраммен боялады, сондай-ақ қия беттері, су ағарлары, кондиционерлерге арналған себеттер орнатылады, балкондар қапталады. Жобаны іске асыруға 668,9 млн теңге бөлінген. Қосымша қаражат бөлінген жағдайда, жұмыстар Әуезов даңғылы бойында екінші кезеңмен жалғастырылатын болады.
Қорытындылай келе, қаланы дамыту жұмыстары жүйелі түрде және бірнеше негізгі бағыт бойынша жүргізіліп жатқанын атап өткім келеді. Қаланың көше-жол желісін дамыту жұмыстары жалғасатын болады. Жолдарды, оның ішінде тізімі алдын ала қалыптастырылған жеке сектор көшелерін асфальттау жалғастырылады. Сондай-ақ негізгі магистральдық көшелерге орташа жөндеу жұмыстарын жүргізу жоспарлануда.
2026 жылы Сәтбаев көшесі мен Жібек жолы көшесі қиылысында көлік айрығын салу жұмыстары жалғасады. Сонымен қатар Пермитин көшесі – Славский көшесі бағытындағы көлік айрығының құрылысы және Есенберлин даңғылы бойындағы жаяу жүргіншілерге арналған жерүсті өткелінің құрылысын аяқтау жоспарланып отыр.
Бұдан бөлек, Самар тасжолы мен Комендантка өзені арқылы өтетін көпірді реконструкциялау, Fresh Market сауда үйі ауданында жаяу жүргіншілерге арналған жерүсті өткелін салу жұмыстарын бастау жоспарланған. Қосымша Аязбаев көшесін кеңейту жобасын әзірлеу жұмыстары жүргізіліп жатыр.
– Әңгімеңізге рақмет!
Сұхбаттасқан Мадияр ТӨЛЕУ
