Алматы облысы ТЖД «112» пультіне Талғар ауданының Еңбекші ауылындағы жеке тұрғын үй ауласында жыландардың байқалғаны туралы хабарлама келіп түсті.
Оқиға орнына Қонаев қаласының жедел-құтқару жасағы жіберілді. Құтқарушылар қауіпсіздік шараларын қатаң сақтай отырып, арнайы құрал-жабдықтың көмегімен екі жыланды ұстады. Ұсталған жыландар адам мекендейтін аумақтан алыс, табиғи ортаға жіберілді.
ТЖМ ескертеді: жаз мезгілінде бауырымен жорғалаушылардың белсенділігі артады. Өз қауіпсіздігіңіз үшін келесі шараларды сақтаңыз:
• Аулаңызды шөптен, қоқыстан және қалдықтан үнемі тазартып отырыңыз.
• Қоршаулар мен дуалдардың бүтіндігін тексеріңіз.
• Егер жылан көрсеңіз, оны өз бетіңізше ұстауға тырыспаңыз.
• Бірден «112» құтқару қызметіне хабарласыңыз.
