Іс-шаралар Наурыз мерекесіне қосымша ғана емес, сонымен қатар Цифрландыру және жасанды интеллект жылындағы бастамалардың нақты көрінісіне айналды. Хакатондар, AI-буткемптер, интерактив көрмелер мен стартап таныстырулар — бәрі бірігіп, Digital Nauryz-ды ел бойынша өткен үлкен технологиялық шараға айналдырды, – деп хабарлайды Aikyn.kz.
Бұл бастаманың басты бағыты — жасанды интеллект пен жаңа цифрлық технологиялар. Қатысушылар тек тыңдап қана қоймай, өз жобаларын жасап көрді. Мысалы, Ақтауда өткен кездесуде адамдар AI құралдарын қолданып, сурет пен мәтін жасауды үйренді. Ал Атырауда өткен Digital Caspian: GenAI Cup байқауында қатысушылар жасанды интеллектті өңірдің ерекшеліктерімен байланыстырып, өз жобаларын ұсынды.
Digital Nauryz-дың тағы бір ерекшелігі — оның практикалық бағыты. Павлодар мен Қызылордада өткен AI Bootcamp бағдарламаларында қатысушылар визуалды контент жасауды, дизайн құруды үйренді.
Жезқазғанда өткен воркшопта қатысушылар ұлттық мәдениетті заманауи цифрлық өнермен қалай үйлестіруге болатынын зерттеді.
Бұл жоба кәсіпкерлікті дамытуға да мүмкіндік берді. Ақтөбеде өткен Baursaq Pitch стартап таныстыруында технология мен ұлттық дәстүрлер қызықты түрде ұштасқан.
Петропавлда мектеп оқушылары өз стартап жобаларын ұсынып, жастардың инновацияға белсенді араласып жатқанын көрсетті.
Сонымен қатар технология мен шығармашылық бағыт та бірге дамып жатыр. Талдықорғанда робот техникасы мен VR жобалары көрсетілген көрме өтті. Ал Шымкент пен Семейде жасанды интеллект көмегімен 3D модельдер мен цифрлық өнер жасау бойынша сабақтар ұйымдастырылды.
Басқа өңірлерде де түрлі форматтағы іс-шаралар өтті: Таразда жылдам цифрлық шешімдер жасауға арналған жұмыстар жүргізілсе, Түркістанда дәстүр мен технологияның болашағы талқыланды.
Барлық шара Astana Hub экожүйесіне кіретін аймақтық IT-хабтарда ұйымдастырылып жатыр. Бүгінде бұл орталықтар тек оқу орны ғана емес, сонымен қатар инновация, кәсіпкерлік және цифрлық дағдылар дамитын маңызды алаңға айналып отыр.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.
