Қазақстан Республикасының Сыртқы істер министрі Ермек Көшербаев Ресей Федерациясының Елшісі Алексей Бородавкинді қабылдады, – деп хабарлайды Aikyn.kz.
Дипломат РФ Сыртқы істер министрі Сергей Лавровтың Е.Көшербаевты Қазақстан Республикасының Сыртқы істер министрі болып тағайындалуымен құттықтауын жеткізді.
Тараптар көпқырлы екіжақты ынтымақтастықтың қазіргі жағдайы мен даму перспективаларын талқылап, оның стратегиялық серіктестік пен одақтастық рухында дәйекті дамып келе жатқанын атап өтті.
Ерекше назар Қазақстан Республикасының Президенті Қасым-Жомарт Тоқаевтың алдағы Ресей Федерациясына мемлекеттік сапарына дайындық мәселелеріне аударылды. Бұл іс-шараның екіжақты байланыстарды барлық бағыт бойынша жандандырудағы жоғары маңызы расталды.
Сұхбаттастар ынтымақтастықты одан әрі нығайтуға және халықаралық аренада іс-қимылдарды тығыз үйлестіруге дайындығын растады.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.
