Руслан Берденов өзінің өтініші бойынша Шымкент қаласы әкімінің орынбасары қызметінен кетті. Ол бұл қызметті биылғы жылдың ақпан айынан бері атқарып келген, – деп хабарлайды Aikyn.kz Шымкент әкімдігінің баспасөз қызметіне сілтеме жасап.
Руслан Берденов 1985 жылдың наурыз айында Шымкент қаласында дүниеге келген. Әл-Фараби атындағы Қазақ ұлттық университетін және КИМЭП университетін “Іскерлік басқару магистрі, қаржылық менеджмент маманы” мамандығы бойынша тәмамдаған.
Еңбек жолын 2007 жылы Procter & Gamble LLP компаниясында бастаған. 2010-2012 жылдары EASTCOMTRANS ЖШС-ның жылжымалы құрамды жалға беру департаментінің директоры, 2012-2018 жылдары “Ақ ниет” ЖШС-ның бас директоры, 2018-2019 жылдары “Ақ ниет” ЖШС-ның бақылау кеңесінің мүшесі, 2019-2023 жылдары Aq Niet Group бақылау кеңесі төрағасының орынбасары қызметтерін атқарды.
2023 жылдың наурызынан қала әкімінің орынбасары болып тағайындалғанға дейін Қазақстан Республикасы Парламенті VIII шақырылымының депутаты, Қаржы және бюджет комитетінің мүшесі болды.
Еске сала кетейік, биыл сәуір айында Берденовті қалалық әкімдік ғимаратының алдында атып кеткен еді. Оған бірнеше рет оқ атылып, жараланған. Кейін шенеунік ауруханаға жеткізіліп, жедел ота жасалды. 20 тамызда Шымкент қалалық соты Берденовке оқ атқан Ернар Жиенбайды кінәлі деп танып, 9 жылға бас бостандығынан айырды.
