Өңір басшысы ауыл спорты ойындарында үздік үштікке ілінген батысқазақстандық спортшылар тобымен жүздесіп, ауыл спорты ойындарын дамытуға әрқашан қолдау болатынын атап өтті. Шара соңында үздік өнер көрсеткен спортшылар марапатталды.
«Ақ бидай» ауыл спорты ойындары биыл сегізінші рет өтті. Бұл жолы ойынды Алматы облысы ұйымдастырған. Басты мақсат – ауылдық жердегі талантты спортшыларды жарыққа шығару, ауыл спортын қолдау.
Төрт жылда бір рет өтетін ойынға Батыс Қазақстан облысының командасы тыңғылықты дайындалды. Алдымен облыста іріктеу шаралары өтіп, сайдың тасындай жігіттер кейін оқу-жаттығу жиындарына аттанды.
Спорт басқармасының басшысы Бақдәулет Сабитов облыстың бұған дейін «Ақ бидай» ойындарында соңғы орындарға тоқтап келгенін, бұл жолы көрсеткішті жақсарту керегін айтқан еді. Талап қойылғасын спортшылар да қамшы салдырмай тер төкті. БҚО қоржынына жарыстың алғашқы күндері ақ алтын медаль түсіп үлгерді. Оны батысқа аударыспақ ойынында өнер көрсеткен жігіттеріміз сыйлады.
Қоржынға алғаш алтынды Бекзат Мұқсаев салды. Кейін Азат Қабылхайыр мен Асуан Құсайынов күмісті қанжығалады. Жалпы, «Ақ бидай» ауыл спорты ойындарына облыстан 200-ге жуық спортшы аттанды. Облыстық спорт басқармасы барлық спортшыларды бірдей формамаен қамтып, үлкен дайындықпен жіберді.
Батысқазақстандық жанкүйерлерді қуантқандардың қатарында садақшылар да бар. Дәстүрлі садақ атудан өнер көрсеткен спортшылар командалық есепте екінші орынға табан тіреді. Мұрат Лұқпанов дәстүрлі садақ атудан алтын алды. Артынша Сырлыбай Ғалымжанов нысанадан мүлт кетпей, күміс медаль иеленді. Ал «Орталық Азия» стилінде Оразай Қайырсапин алтын, Закира Жолсарина күміс алып, елдің еңсесін тіктеді.
– Менің садақ ату мектебіне келгеніме екі жылдан асты. Негізі, өзім мектепте сабақ беремін. Қосымша бос уақытымда садақ атып дағдыланамын. Бүгін күміс жүлдегер атанып жатырмын. Әрине, қуаныштымын. Садақ ату бұл үлкен терпаия секілді ғой. Дәлдікті қажет ететін спорт түрі, – дейді дәстүрлі садақ атудан күміс жүлдегер Закира Жолсарина.
Биылғы «Ақ бидай» ойындарында қазақ күресіне шыққан спортшылар да осал болмады. Айта кетейік, жалпы «Ақ бидай» ойындарында Батыс құрамасы күрестен жүлделі болып көрмепті. Бірақ биыл спортшылардың бабы мен бағы қатар шауып алтын медальді еншілеп қайтты. Бозкілемнің шаңын бұрқ еткізген қазақ күресінің білекті балуандары көп болды. Мейірім Айғали алтын алса, Нұрсұлтан Мырзахметов күміс иеленді, ал Мерей Бердіғали қола қанағат тұтты. Тайман Нұрғалиев те қарсыласын қапы қалдырып, «Ақ бидай» ойындарының чемпионы атанды. Бозкілемде белдескен бұл спортшылар батыстың командалық есебін еселеді.
Шешуші жарыс күні шын ерлікті тоғызқұмалақшылар көрсетті. Ақылдың ойыны, қазақтың даналық діңгегі болған бұл спорт түрінен қос алтын, бір күміс иеленді. Бектас Кенжеғалиев пен Қарақат Сәлімғали алтын, Ақбота Қоңырова күміс жүлде алды.
Соңғы сәттегі тоғызқұмалақшылардың бұл жетістігі БҚО командасы үшін ең үлкен сый болды. Осылайша, «Ақ бидай» ауыл спорты ойындарында командалық есепте үшінші орынға табан тіреді. Бұл – ауыл спорты ойындарында бұрын-соңды болмаған жеңіс.
Спортшылардың өздері мұны тарихи жеңіс деп атап отыр. Расымен де, бұл жолғы төккен тер ақталып, спортшыларымыз үздіктер қатарына кірді.
Айта кетейік, «Ақ бидай» жарысы биыл 20 спорт түрі бойынша өткізілді. Жарыстың жабылу салтанатында «Ақ бидай» ойындарын өткізген Алматы облысы эстафетаны Солтүстік Қазақстан облысына тапсырды. Енді төрт жылдан кейін доданың алауы еліміздің солтүстігінде тұтанады.
Жанат ҚАЙЫРҒОЖИНА
