Осыған орай атаулы күннің қарсаңында Президентпен жүздесіп, «Қазақстанның еңбек сіңірген ұстазы» құрметті атағын алған мұғалімдерге хабарласып, пікірлерін сұраған едік.
Гүлмира ШЕРАЛХАН,
Қазақстанның еңбек сіңірген ұстазы:
Қоғамның қандай болмағы – ұстаздан
Қазақстан Республикасының Президенті Қасым-Жомарт Тоқаевтың қолынан 2025 жылғы «Қазақстанның еңбек сіңірген ұстазы» наградасын алу маған үлкен бақыт және қуаныш сезімін сыйлады. Ұстаздың мәртебесін заңмен бекіту, әлеуметтік жағдайын жақсарту бағытында бірқатар игі іс атқарылды.
Менің бала күнгі арманым мұғалім болу еді. Жалпы жұмыс өтілім 28 жылды құрайды. Мектеп директорының орынбасары болдым. Шығармашылық топтың мүшесі, қазақ тілі мен әдебиеті пәні бойынша мұғалімдік қызметім, «Қазақ тілі» деген анықтамалық құралым, авторлық жеке бағдарламам бар. Мұғалімдікке жол көрсеткен Махамбетәлиева Зәуре ұстазыма алғысымды білдіремін. Ұстазым республикалық олимпиадалардың жеңімпазы. Өзім республикалық, халықаралық конференцияларда баяндама оқыдым. Сонымен қатар «Ы.Алтынсарин» медалі, «Үздік педагог» байқауының жеңімпазымын.
Мұғалім – қоғамның бет бейнесі. Қоғамның қандай болмағы – ұстаздан. Жарқын болашақтың іргетасын қалайтын да мектеп. Мен өз еңбегімнен ләззат алып, өз ісімнен бақыт тапқан адаммын. Өзім сияқты қыз-келіншектерге айтарым, қызметтің қамымен жүріп, отбасы бақытын тасада қалдыруға болмайды. Мені қолдап-қуаттап жүрген отбасыма ризашылығымды айтамын.
Ұлжан РАЙЫМБЕКОВА,
Қазақстанның еңбек сіңірген ұстазы:
Сенім мен құрметтің көрінісі
Ұстаздар күні қарсаңында Мемлекет басшысының қолынан «Қазақстанның еңбек сіңірген ұстазы» атағын алу мен үшін жүрек толқытқан ерекше сәт болды. Бұл марапат жеке жетістік емес, бүкіл ұстаздар қауымына көрсетілген зор сенім мен құрметтің көрінісі деп білемін.
Президентіміз өз сөзінде адал азамат тәрбиелеу, жасанды интеллект заманында адами құндылықтарды сақтау, «Таза Қазақстан» идеясына үлес қосатын ұрпақ қалыптастыру туралы ерекше атап өтті. Бұл – тікелей мұғалімдердің, біздің қолымыздағы аманат. Себебі ұлттың болашағы мұғалімнің қолында.
Ұстаздық кез келген кәсіптен биік, кез келген мамандықтан бөлек ерекше жол екенін атап өткім келеді. Біз шәкірттің көзіндегі отты сөндірмей, арманын қанаттандыратын жандармыз. Әрбір оқушының жетістігі – ұстаз еңбегінің жемісі. Сондықтан Президенттің құттықтау сөзі – ұстазға берілген баға ғана емес, біздің болашаққа бағытталған еңбегіміздің мойындалуы.
Ұстаз болу – тек сабақ беру емес, жүрек жылуын бөлісу, әр баланың тағдырын сезіну. Біз шәкіртке білім ғана емес, өмірлік құндылықтарды да үйретеміз. Оқушының елжанды азамат болып өсуі – ұстаздың тәлім-тәрбиесіне тікелей байланысты.
Мемлекет тарапынан көрсетілген сенім – бізге шабыт әрі міндет. Бізге артылған сенімді ақтау үшін білім саласында болып жатқан жаңалықтар мен өзгерістерге ілесіп қана қоймай, оны дамытуға үлес қосуымыз қажет. Әлемдік деңгейде ойлайтын, ұлттық болмысты сақтайтын, заманауи технологияны меңгерген шәкірт тәрбиелеу – басты мақсатымыз.
Осы марапат арқылы үлкен жауапкершілік жүгін сезіндім. Ендігі міндет – тек білім беру емес, елге адал, парасатты, жауапты жас ұрпақты тәрбиелеуге бар күшімді салу. Жаңа заман талаптарына сай жаңаша ойлайтын, бірақ ұлттық рухы биік шәкірт өсіру – басты борышым.
Осы мерекелі күні мен барлық әріптестерімді құттықтаймын! Сіздердің еңбектеріңіз – елдің ертеңіне қаланған берік іргетас. Ал шәкірттерімізге айтарым, ұстаздарды құрметтеңіздер, өйткені ұстаз екінші анаңыздай жан.