Аймақ минералдарға өте бай, мұнда көмір, газ, мұнай, әктас, күміс, мырыш және басқа да металдардың мол қоры бар. Өңір бюджетін қалыптастыруда ауыл шаруашылығының да үлесі мол.
Бұл өңір еліміздегі ең инвестициялық тартымды аймақтардың бірі саналады. Облыс әкімі Асхат Шахаров алдағы уақытта инвестиция тарту мәселесіне басты назар аударылатынын жеткізді. Оның айтуынша, өңірде инвестиция көлемін шамамен 1,5 триллион теңгеге жеткізу көзделген.
«Біз былтыр 106,3 пайыз экономикалық өсімге қол жеткіздік, бұл орташа республикалық көрсеткіштен жоғары. Жолдар мен инфрақұрылымның жағдайын жақсарттық, тұрғын үй құрылысының мүмкіндіктерін кеңейттік. Осы жылы ауқымды инфрақұрылымдық жобаларды іске асыруды және халықтың өмір сүру сапасын арттыру үшін әлеуметтік саланы дамытуды жалғастырамыз. Биыл кем дегенде 7 пайыз деңгейінде экономикалық өсуді қамтамасыз етуді жоспарлап отырмыз. Өнеркәсіпте өндіріс көлемі – 2,7 триллион, ал инвестициялар мөлшері шамамен 1,5 триллион теңгеге жетеді деп күтілуде. Ал нормативтік жағдайдағы автожолдардың үлесін 82 пайызға жеткізу үшін биыл 60 миллиард теңгеге 156 жол жобасы іске асырылады. Инженерлік инфрақұрылым бөлігінде біз 3 мыңнан астам халқы бар 10 ауылда ауызсу мәселесін толығымен шеше отырып, сумен жабдықтауды жүргізуді жоспарлап отырмыз. Газдандыру саласында 9,8 мыңға жуық адам тұратын 24 ауыл қамтылады. Сондай-ақ биыл облыста бір миллион шаршы метр тұрғын үйді пайдалануға беру жоспарлануда. Біз өңірде тіршілікке қолайлы жағдай жасау және орнықты даму үшін барлық бағыт бойынша жүйелі жұмысты жалғастыратын боламыз», – дейді облыс әкімі.
Өңірде экономиканы әртараптандыруға және бизнестің дамуына серпін беруге бағытталған «Ақтөбе» арнайы экономикалық аймағы мен «Хромтау» индустриялық аймағы құрылды. 858 гектар аумақты қамтитын арнайы экономикалық аймақ көлік-логистикалық бағыттағы 9 негізгі сала мен өнеркәсіптің 29 бағытын дамытуға жоспарланған. Сонымен қатар бұл аумақта заманауи өндірістер құруға, инновациялық технологияларды енгізуге және отандық әрі халықаралық жетекші компанияларды тартуға баса назар аударылады. Ал Хромтау қаласында 150 гектар аумақты қамтитын индустриялық аймақ импорттық өнімдердің орнын басатын тауар өндіруге бағытталып отыр. Мұндағы негізгі мақсат – өндірістегі жергілікті қамту үлесін шамамен 80%-ға жеткізу. Хромтау индустриялық аймағында кәсіп ашуды көздейтін жергілікті инвесторлар аз емес. Қалада шағын және орта кәсіпкерлік белсенділікті ынталандыру және ірі өнеркәсіптік кәсіпорындарды шоғырландыру мақсатында «Өркен» өңірлік бағдарламасы жұмыс істейді.
Облыс әкімі Асхат Шахаровтың Қытайға сапары аясындағы кездесулер өңірге инвестиция тарту және индустриялық даму бағытын жаңаша, заманауи үлгіде жобалауға, Ақтөбенің жаңа тынысының ашылуына жасалған зор мүмкіндік болып отыр.
«Біз Қытайдың индустриялық даму саласындағы озық тәжірибесімен таныстық. Әсіресе, бір өнеркәсіптік алаңда шағын және орта бизнес үшін жағдай жасау жобасы ерекше қызықты болды. Бұл бағыт арнайы экономикалық аймақ шеңберінде тиісті инфрақұрылым жасақтаған біздің өңіріміз үшін де өзекті. Мұндай сапарлар қайта өңдеуді, металлургия саласын және жоғары технологиялық өндірістерді қалай дамытуға болатынын іс жүзінде көруге мүмкіндік береді», – дейді Асхат Шахаров.
Өңірде атқарылып жатқан қандай жоба-жоспарды алып қарасақ та мұның барлығы аймақтың экономикалық белсенділігін арттырып, жергілікті тұрғындардың табысын көтеруге үлес қосып отырғанын көреміз. Мәселен, «Ауыл аманаты» жобасының нәтижесінде өңірдің әлеуметтік-экономикалық дамуына оң әсер ететін бірқатар көрсеткішке қол жеткізілді. 2025 жылы бағдарламаға республикалық бюджеттен 4,0 млрд теңге қарастырылды. Сонымен қатар кәсіпкерлердің қайтарым қаражаты есебінен (револьверлік несиелеу) 1,2 млрд теңге бөлініп, жалпы 16,3 млрд теңгеге 2 866 жоба қаржыландырылды. Бұл 3 мыңға жуық жаңа жұмыс орнының ашылуына мүмкіндік берді. Жобаның негізгі бағыттары: мал шаруашылығы, өсімдік шаруашылығы, құс шаруашылығы және шағын бизнес. Атап айтқанда, құс етімен қамтамасыз ету 5,6%-ға, көкөніспен қамтамасыз ету 5,4%-ға, картоппен қамтамасыз ету 4%-ға артты. Жоба аясында 1 620-дан астам жаңа кәсіп ашылды. Әлеуметтік аз қамтылған тұрғындарды қолдау мақсатында 41 атаулы әлеуметтік көмек алушы отбасы жобамен қамтылды. Мемлекет басшысының тапсырмасы негізінде тауарлық несиелеу тетігі енгізілді. Бұл тетік кепілге қоятын мүлкі жоқ, несиелік міндеттемелері көп, аз қамтылған және көпбалалы отбасыларды қолдауға бағытталған.
Жалпы алғанда, облыста өңірді индустрияландыру және инвестиция тарту арқылы экономиканы әртараптандыру, орта және шағын бизнесті қолдау, кәсіпкерлікті дамыту, халықты жұмыспен қамту, тұрғын үй және шаруашылық инфрақұрылымын жаңғырту бағытында ұтымды жобалар жүзеге асырылып жатыр.
Тілекгүл ЕСДӘУЛЕТ