BBC News хабарламасына сүйенген Aikyn.kz Рим Папасының алғашқы апостолдық сапары барысында жасаған мәлімдемелерін талдайды.
Рим Папасы Лев XIV Режеп Тайип Ердоғанмен кездесуінде Түркия президентін диалог пен ынтымақты күшейтуге шақырды. Фото kiprinform.com сайтынан алынды
Рим Папасы Лев XIV Түркия мен Ливанға жасайтын алғашқы шетелдік сапарының басында әлем «жаһандық деңгейде қақтығыстарға» жол бермеуі керек екенін ескертті. «Адамзаттың болашағы қыл үстінде тұр», – деді Рим Папасы Режеп Тайип Ердоғанмен кездесуінде. Понтифик Түркия президентін диалог пен ынтымақты күшейтуге шақырды.
Рим Папасы Түркияда 4 күн болып, Ливанның астанасы Бейрутқа 30 қарашада ұшып келеді деп жоспарланған. Бұл сапарлар Папа Франциск жоспарлаған кездесулердің жалғасы саналады.
Лев XIV қазіргі әлемде болып жатқан соғыстар «бөлшектенген үшінші дүниежүзілік соғысқа» ұқсайтынын атап өткен. Бұл пікірді де оның алдындағы Папа Украина, Сирия, Мьянма және өзге өңірлердегі қақтығыстарды меңзеп, бірнеше рет айтқан болатын. Алты ай бұрын понтифик атанғаннан бері ол аса сабырлы, тіпті сақ саясаткер ретінде танылды. Алайда бұл сапар оның дипломатиялық қабілеттерін терең сынақтан өткізбек.
Сапардың негізгі сәттерінің бірі – ежелгі Никея орналасқан Түркиядағы Изник қаласына баруы болмақ. Папа Лев және әртүрлі христиан дінінің көшбасшылары осыдан 1700 жыл бұрын өткен тарихи собордың мерейтойына орай жиналады.
Бұл жерде б.д. 325 жылы 200-ден астам епископ Иса Пайғамбардың Құдайдың Ұлы екеніне сенім білдірген. Кейін «Никей сенім символы» деп аталатын догманың негізі қаланған.
Бұдан кейін Шығыс және Батыс христиандық тармақтар бөлінгенімен, осы сапарда бірлік пен татулықты арттыруға бағытталған үндеулер көбірек айтылады деп күтілуде. 29 қарашада Рим Папасы атақты Сұлтанахмет мешітіне барады. Ол дінаралық диалог аясында діни көшбасшылармен кездеседі.
Ливанға сапарында Папа көптеген діни көшбасшылармен кездесіп, жастардың пікірін тыңдайды. Бұл сапар ел халқының үштен бірін құрайтын христиандарға қолдау көрсетуді де көздейді.
Сапардың соңғы күнінде Лев XIV 2020 жылы Бейрут портында болған жойқын жарылыстың орнында месса өткізіп, 200-ден астам қаза тапқан және 7 000-нан аса жараланған адамға дұға бағыштайды.
Папа Лев XIV өзінің алдындағы прогрессивті идеяларды абайлап жалғастыра отырып, дәстүршілдердің пікіріне де құлақ асып келеді. Ол бірнеше рет соғысты тоқтатуға шақырды, бірақ оның үндеулері Папа Францискке қарағанда әлдеқайда байсалды болды.
Осы сапар аясындағы Түркия президенті Режеп Тайип Ердоғанмен, Ливан азаматтық қоғамы өкілдерімен кездесулер Понтификке аймақтық қақтығыс жөніндегі өз көзқарасын ашық түсіндіруі мүмкін. Папаның сапар соңында Римге қайтар жолдағы дәстүрлі баспасөз конференциясында берген бағаларын да көпшілік күтуде.
Бұл сапарда журналистер Рим Папасының ағылшынша «чикаголық акцентпен» сөйлегенін де еститін болады. Көп тілді еркін меңгерген Папа Лев XIV бұған дейін негізінен итальян тілінде сөйлеген. Ватиканның мәліметінше, ол Түркиядағы барлық ресми кездесулерде ағылшын тілінде, ал Ливанда аздап француз тілінде сөйлейді.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.
