Америкалық CNBC телеарнасының хабарламасына сүйенген Aikyn.kz сенсациялық жаңалықтың жасырын астарын түсіндіреді.
Nvidia бас директоры Дженсен Хуанг компанияның ең қуатты Blackwell чиптерін таныстыруда. Фото theinformation.com сайтынан алынды
Nvidia бас директоры Дженсен Хуанг компанияның ең жаңа Blackwell процессорын Қытай нарығына шығару мүмкіндігі бар екенін айтып қалды. Оның ойынша, америкалық чип өндірушілерінің жаһандық нарықта жетекші рөл атқаруы үшін АҚШ үкіметі осындай рұқсат беруі қажет. Ол Қытайдағы жасанды интеллект нарығының келесі жылы 50%-ға өсетінін де болжады.
«Blackwell чипін Қытай нарығына шығару мүмкіндігінің ықтималдығы жоғары. Біз тек АҚШ технологиялық компанияларының ЖИ жарысында көшбасшы болуы мен америкалық технологиялық экожүйені әлемдік деңгейге шығару қаншалықты маңызды екенін дәлелдей беруіміз керек», – дейді Хуанг сәрсенбі күні Nvidia компаниясының соңғы тоқсандық нәтижелеріне пікір білдіре отырып.
Шілде және тамыз айларында Хуанг Ақ үйде болып, Қытайға арналған H20 жаңа буын Nvidia чипін экспорттауға лицензия алу үшін келіссөздер жүргізген. Тамыз айында Ақ үй президент Дональд Трамп пен Хуангтың келісімге келгенін хабарлады. Келісімге сәйкес, Nvidia Қытайда H20 сатылымынан түскен табыстың 15%-ын АҚШ үкіметіне аудару шартымен экспорттық лицензия алған.
Кездесуден кейін Трамп Blackwell чиптері бойынша да келісім жасауға дайын екенін айтқан еді. Бұл чиптер Nvidia-ның деректер орталықтарындағы негізгі табыс көзі саналады.
Дженсен Хуанг Қытайдағы жасанды интеллект нарығының келесі жылы 50%-ға өсетінін болжады. Фото chinadailyhk.com сайтынан алынды. Авторлығы: Reuters
Дженсен Хуанг Қытайдағы жасанды интеллект әзірлеушілері Nvidia чиптерін пайдаланғаны дұрыс екенін, экспортқа тыйым салу Қытайды өз чип технологиясын дамытуға ынталандыратынын атап өтті.
Blackwell чипін Қытайда шығару компания сатылымдарын айтарлықтай арттыра алады. Дегенмен АҚШ экспорттық ережелеріне сай Nvidia чиптерді белгілі бір тұстарда баяулатып қайта құрастыруға мәжбүр болады.
«Blackwell өте озық жоба. Мен онымен келісімге бармас едім. Бәлкім, біз Blackwell-дің сәл әлсіретілген нұсқасы бойынша келісімге келуіміз мүмкін», – деген астарлы мәлімдемені президент Трамп тамыздың басында жасаған болатын.
Nvidia компаниясының сәрсенбі күнгі (27 тамыз) оптимистік мәлімдемелері компания кірісінің өткен жылдың сәйкес кезеңімен салыстырғанда 56%-ға өсіп, 54 млрд долларға жеткенін көрсетті. Бұл көрсеткіш H20 чиптері Қытайда мүлде сатылмаған тоқсанда тіркелген. Компания H20-дің 650 млн долларлық сатылымының 180 млн доллары Қытайдан тыс клиенттен алғанын хабарлады.Компания қазан айындағы тоқсанда Қытайға H20 сатылымы болмайтынын, бірақ геосаяси жағдайға қарай 2–5 млрд доллар көлемінде чип сатылымы мүмкін екенін жариялады.
«Егер бізде көбірек тапсырыс болса, көбірек өндіре алатын едік», – деді Nvidia қаржы директоры Колетт Кресс сарапшылармен телефон арқылы болған әңгімеде.
Кресс сонымен қатар АҚШ үкіметінің 15% үлесті қалай алатыны туралы ресми ереже әлі жарияланбағанын айтты.
Хуанг Қытайдың әлемдегі екінші ірі ЖИ нарығы екенін атап өтті: «Менің есебімше, Қытай нарығы биыл шамамен 50 млрд долларлық мүмкіндік береді. Оның жыл сайын 50%-ға өсетіні күтіледі».
Кейбір хабарламалар Қытай үкіметінің отандық чиптерді қолдауға шақырып отырғанын көрсетеді.
«Әлі де бірқатар геосаяси мәселелердің шешілуін күтіп отырмыз. Бұл сатып алу шешімдеріне және олардың жоспарларына әсер етеді», – дейді Кресс.
АҚШ Қытайды озық чиптермен «тоқтатпақшы». Бірақ Қытайды алдау қиын. Қытай технологиялық тәуелсіздікке басымдық беріп, өз чиптерін дамыта беруді көздеуде. Сондықтан Nvidia-ның «америкалық чиптерді Қытайға сатып табыс табайық, олар біздің чиптерді қолданып, өздерінің өндірісін баяулатады» деген стратегиясы нәтижесіз болады деп ойлаймыз. Бұл технологиялық алпауыттың АҚШ үкіметінен Blackwell чиптерін Қытайға сату үшін лицензия алуға арналған «өзара келісімі» болуы мүмкін.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.
