Ал Нұра ауданында Е. Бөкетов атындағы Қарағанды зерттеу университетінің экспедиция мүшелері шамамен мың жыл бұрын өмір сүрген баланың қабірін тапты, – деп хабарлайды Аikyn.kz сайты. Табылған мұра жайында “Айқын” газетінде материал жарияланды.
Табылған зират – бұрын белгілі болған Изенді-6 бейітінің бір бөлігі.
Онда ғалымдар марқұмның сүйегін, жебе ұштарын, ат әбзелдерінің бөлшектерін және былғары дорба тапты. Сүйектің жанынан сұрақ белгісі түріндегі сырға табылды. Мұндай сырғалар XII-XIV ғасырларда қыпшақтарға тән болатын.
Антрополог Айкүміс Раисова кешенді остеологиялық талдау жүргізіп, сүйек 9-12 жастағы балаға тиесілі екенін анықтады. Сондай-ақ баланың тірі кезінде сол жақ иық сүйегін сындырғаны анықталды. Бірақ өлген сәтте сынық бітіп үлгерген.
– Мұндай жерлеулер сирек кездеседі. Орта ғасырдағы ескерткіштер Қарағанды облысының аумағында аз зерттелген, сондықтан осы кезең бойынша алынған жаңа нәтижелер өзекті және қызықты, – дейді Сарыарқа археологиялық институтының директоры Алексей Кукушкин.
Радиокөміртекті талдаудың деректеріне сәйкес, көму ХІІ-ХІІІ ғасырларда болған. Ғалымдар қосымша талдау жүргізіп, жерлеуді зерттеуді жалғастырмақшы. Одан әрі артефактілер облыстық тарихи-өлкетану мұражайына тапсырылмақ.
