Осы бір ізгілікті ұстанымды өмірлік қағидасына айналдырған азаматтардың бірі – Мейірхан Қыдырбайұлы. Ол көпке көріне бермейтін, бірақ әрбір адамның амандығы мен өндіріс орындарының тұрақты жұмыс істеуіне тікелей ықпал ететін қауіпсіздік техникасы саласының білікті маманы. Күн сайын көзге көрінбейтін қауіптің алдын алып, әріптестерінің аман-есен жұмыс істеуіне жағдай жасап жүрген оның еңбегі шынайы ерлікпен пара-пар.
Мейірхан Қыдырбайұлы 1984 жылы 17 мамырда Оңтүстік Қазақстан облысы Сайрам ауданына қарасты Тассай ауылында дүние есігін ашты. Кеңпейіл қазақы ауылдың тыныс-тіршілігін бойына сіңіріп өскен ол бала жастан еңбекке ерте араласып, адалдықты ту етті. Бүгінде төрт баланың асқар таудай әкесі, отбасына қорған, қоғамға пайдалы азамат ретінде үлкендерге сыйлы, кейінгілерге үлгі.
Қазір біздің кейіпкеріміз Zeinep ЖШС-ында қауіпсіздік техникасы маманы болып қызмет атқарады. Қарапайым көрінгенімен, бұл аса үлкен жауапкершілікті талап ететін сала. Өйткені жұмыс орнындағы әрбір қызметкердің денсаулығы мен өмір қауіпсіздігі тікелей осы маманның біліктілігі мен мұқияттылығына байланысты. Мейірхан Қыдырбайұлы бұл міндетті кәсіби шеберлікпен, шын ниетпен, асқан ұқыптылықпен атқарып келеді.
Мейірхан ешқашан даңқ пен марапаттың соңынан қуған жан емес. Бірақ оның қатаң тәртіпке деген талапшылдығы, әріптестері мен басшылық алдындағы жауапкершілігі оның тұлғасын даралап, еңбегіне деген құрметті арттыра түсті. Ұжымдастары оны сабырлы, салмақты, сенімді маман ретінде сипаттайды. Ол – сөзімен емес, ісімен өнеге көрсетіп жүрген азамат.
Ол қауіпсіздік ережелерінің орындалуын қадағалау ғана емес, адамдардың өмірі мен денсаулығын сақтау жолында үнемі сақтық шараларын жетілдіріп отырады. Көпшілік байқай бермейтін өндірістегі ұсақ-түйек қауіптердің алдын алу – Мейірхан үшін күнделікті міндет. Оның еңбегі үнсіз, бірақ өлшеусіз құнды.
Қоғамда көп айтылмайтын, бірақ іргетас болып қаланған еңбектер бар. Ондай еңбек иелері ешқандай мінберге шықпай-ақ еліне, жеріне қалтқысыз қызмет етіп жүрген қарапайым жандар. Мейірхан Қыдырбайұлы сондай жандардың жарқын бейнесі. Елдің тыныштығы мен дамуы осындай бейбіт еңбекпен, жауапты жұмыспен қалыптасады. Қауіпсіздік техникасы – кәсіпорынның тыныс-тіршілігін реттейтін басты салалардың бірі. Ал сол салада кәсіби білігімен, адалдығымен танылған азаматтардың еңбегі қандай құрметке болса да лайық.
«Еңбек – елдің бақуаттылығының негізі» десек, сол еңбектің нағыз иесі адал жүректі, кәсібіне берілген жандар. Мейірхан Қыдырбайұлы – осындай адал да абзал азаматтардың бірі. Оның өнегелі өмірі мен еңбек жолы бүгінгі ұрпаққа үлгі, ертеңге сенім. Біз ел үшін тынымсыз тер төгіп жүрген қарапайым еңбек адамдарын құрметтейміз. Өйткені олар мемлекеттің іргесін берік етіп тұрған мызғымас тіректер. Осындай азаматтарға бас иіп, алғыс білдіру – әрқайсымыздың азаматтық борышымыз.
Назгүл НАЗАРБЕК,
Шымкент қаласы
